Бүгүн улуттук намыска жана руханий баалуулуктарга шек келтирген иштерди токтотуу максатында митинг болду. “Кырк чоро” коомдук уюмунун төрагасы Замирбек Көчөрбаев мындай көрүнүшкө ЖКнын депутаттары чара көрүүсүн талап кылушууда экенин айтты. “Манас”, “Семетей”, “Сейтек”, “Кырк чоро”, “Ата-Мекен”, “Ата-Журт”, “Ар намыс” жана башка ата-баларыбыздан бери муундан муунга өтүп, өзгөчө маани берип ыйык тутуп келген ысымдар, ыйык сөздөр, бүгүнкү күндө арак ичимдиктерге, конфет шоколаддарга коюлуп, саясий партиялардын аттары аталып келет. Кыргыз баласы өтө этият колдонуп кадырлап - кастарлап айтып келген сөздөрдүн касиетин учуруп, маңызын бурмалап, маанисин кетирип катардагы бир жөнөкөй сөздөрдөн да төмөн түшүрүп учурда колдонулууда. Андан тышкары айрым сүрөтчүлөр кыргыз апасына курал карматып, карышкырга калпак кийгизип, кыргыз улутук кийинчен кызды сойку кылып көрсөтүп, кыргыздарды шылдыңдап, калпактарга жөргөмүш тартып ачык сүрөт көргөзмөсүн уюштуруп келет. Эгер ЖКнын депутаттары бул ишке эч кандай чара көрбөсө, анда нааразычылык акциялары улана берет",-дейт З.Көчөрбаев.

Кайрылууну ЖКнын депутаты Каныбек Иманалиев жана Кыргызпатенттин өкүлдөрү чыгышты. Ыйык аттардын аталышындагы ичимдиктерди рыноктон алып салуу үчүн Кыргызпатенттин өкүлдөрү иш-аракеттерди көрө тургандарын айтышты. Ал эми кыргыздын кадыр-баркына шек келтирген сүрөтчүлөрдүн көргөзмөсүн жана алардын иш-аракетин ЖКын депутаты Каныбек Иманалиев колго ала тургандыгын билдирди. Бул боюнча ал атайын эксперттик комиссия түзүп, сүрөтчүлөрдү жоопко тарта тургандыгын белгиледи.