Баарыңыздарга маалым болгондой, үстүбүздөгү жылдын 4-октябрында Кыргыз Республикасынын Жогорку Кеңешине шайлоо болгону турат. Бул саясий өнөктүктүн мааниси зор.

Кыргызстандыктар буга чейин өткөрүлгөн таза эмес шайлоолордон тажап бүттү. Эгемендик жылдарында канча шайлоо болсо, дээрлик ошончо жолу мыйзамды одоно, уятсыздык менен бузууга жол берилди. Айрым саясий күчтөр шайлоочулардын добушун сатып алууга барышса, кээ бир саясий күчтөр административдик жана башка ресурстарды каалагандай колдонушту. Натыйжада, шайлоонун жыйынтыгы калайык калктын таламдарына туура келбей, журттун ыркы кетип, ынтымагы бузулду. Эки президент чет мамлекеттерге качты. А түгүл республикабыздын аймактарында, борборунда кан төгүлүп, күнөөсүз бир туугандарыбыз көз жумушту. Сиздер анын баарын баштан кечирдиңиздер. Кимдин ким экенин, кимдин ою кандай экенин жазбай түшүндүңүздөр.

Урматтуу шайлоочулар! Үстүбүздөгү жылдын 4-октябрында бизге, саясатчыларга, бүткүл журтубузга да мурда кетирген кемчиликтерибизди оңдоого тарыхый мүмкүнчүлүк түзүлүп отурат. «Бүтүн Кыргызстан Эмгек» партиясы сиздерди ошол мүмкүнчүлүктөн пайдаланууга чын дилден чакырат.

Биздин партия башынан эле шайлоо өнөктүгүн мыйзам тарабынан белгиленген тартипте гана өткөрүүнү жактап, баардык саясий күчтөрдү ушул чакырыкка кошулууну сунуш кылган.

«Бүтүн Кыргызстан Эмгек» партиясы шайлоо өнөктүгүнүн учурунда элге куру убада бербейт, шайлоочулардын добушун акча жана башка материалдык кызыктыруулар аркылуу сатып алууга барбайт, административдик ресурстарды колдонбойт, мурда бүткөргөн иштерин кайра-кайра кайталап айтып, колко кылбайт. Мындай жол –биздин жол эмес.

«Бүтүн Кыргызстан Эмгек» партиясынын күчү анын так программасы менен шайлоо алдындагы тепкичи. Биз ар кайсыны бир айтып, элдин башын адаштырбай, өз үйүбүзгө, тээ Манас атабыздан бери калыптанган рухий баалуулуктарыбызга кайталы деп келебиз. Бул, биринчиден. Экинчиден, «экономика, экономика жана дагы экономика» деп баса көрсөтүүдөбүз.

Биздин лидерлерибиз, партиянын теңтөрагалары Адахан Кимсанбаевич Мадумаров менен Аскар Мааткабылович Салымбеков жер-жерлердеги шайлоочулар менен болгон жолугушууларда Кыргызстанды цивилизациялуу жол менен өнүккөн өлкөлөрдүн катарына кошуунун механизмдерин түшүндүрүүгө басым жасашууда. Алардын негизгилери жумуш орундарын көбөйтүү, кооперацияларды түзүү, орто жана кичи бизнести колдоо, кен байлыктарды казууга

жана андан түшкөн кирешени бөлүүгө жергиликтүү тургундарды тартуу. Саясий жагынан болсо, болочокто Кыргызстанда президенттик-парламенттик башкарууну түзүү менен, коомубузда кеңири жайылган коллективдүү жоопкерсиздикти жоюп, мамлекетибиздин тышкы, ички коопсуздудугун камсыз кылып, турмушу тартыш үй-бүлөлөрдүн жашоо шартын оңдоо болуп эсептелет.

«Бүтүн Кыргызстан Эмгек» саясий партиясы бул жолку шайлоонун мыйзамдын чегинде, толук кандуу уюштурулушуна жана өткөрүлүшүнө салымын кошот. Себеби, шайлоо ушундай багытта өткөндө гана элибиз-жерибиз деп талбай күйгөн уул-кыздарыбызга жол ачылат.

Партиянын миңдеген мүчөлөрү жана он миңдеген жактоочулары, санаалаштары ушундай пикирде экенине ишенебиз. Анткени бул кыргыз элинин, жалпы Кыргызстандыктардын, тилек-үмүтү. Келгиле, элдин үмүтүнө муздак суу сеппейли, ар бир шайлоочунун добушуна ак эмгегибиз менен арзыйлы. Ар бир добуш жүрөктөн берилсин, ал эми жүрөгүбүз элим, жерим, чындык деп соксун?!

Кыргызстандын 5 жылдык келечегин тандоо укугу ар бириңиздердин колуңуздарда, өлкөнүн тагдыры сиздердин тандооңуздарда. Бүтүндөй Кыргызстан Эмгек менен өркүндөсүн!