Бүгүнкү күндө коомчулукта “элита” деген түшүнүк өз маанисин жоготуп, шарттуу түрдө колдонулуп келет. Жаңы саясий элита кандай болуш керек жана аларды кантип тарбиялоо деген суроолор туулуп келет.

Саясат таануучу, тарых илимдеринин кандидаты Табылды Акеровдун айтымында,  саясий элита өзүнүн ар бир кадамдары менен, сүйлөгөн сөзү менен коомго, карапайым элге үлгү боло тургандай аракеттерди жасоосу зарыл.

- Ошондо гана ал «эл каймагы» деген атка татыктуу боло алат. Бирок саясий элитаны жогору жактан, бийлик тарабынан өзгөртүп, түзөсө болбойт. Себеби, адамдардын баары эле саясат менен алышкысы келбейт. Көпчүлүк адамдар саясаттан оолак болууну көздөшөт.Ошондуктан, саясий элитаны эл гана өзүнүн шайлоодогу саясатчыларга карата берген добуштарына жараша алмаштыра алат. Саясий элитаны саясий партиялар жаңырта алат. Алар өздөрү мониторинг жүргүзүп, анан мыкты, жаңы саясат менен алышкысы келген жаштарды өзүлөрүнүн катарына алып, аларды тарбиялап чыкса болот.

Ал эми Жогорку Кеңештин эркин депутаты Өмүрбек Абдырахманов саясий элита саясий идеяларга карата калыптана турганын айтты.

-Эгер биз демократия курабыз десек, демократиялык баалуулуктарды, анын принциптерин жана стандарттарын жаштарга үйрөтүшүбүз керек. Батыштан билим алган жаштар гана системаны өзгөртө алышат. А эгер авторитардык коом курабыз десек, азыркыдай эле саясый көз карашы жок, "жакшы бол, бир бол, аман бол" деген эле тарбия жетишет.

Жаңы элита коомго өзүнүн турганы, басканы менен, жашоо турмушу менен жана кылган иштери менен үлгү болушу зарыл жана эскилерден 100 пайыз айрымаланышы керек экенин КСДП фракциясынын депутаты Данияр Тербишалиев билдирди.

-Жаны саясий элитага талаптар көп эң негизгиси таза, булганбаган, туруктуу жана билимдүү. Мындан тышкары дагы критерийлер бар. Бирок мен атап кеткендер эң маанилуү. Ар бир критерийдин артында терең маани бар. Алдыга өзүнүн кызыкчылыктарын койбой жалпы мамлекеттик кызыкчылыктарды коргоп турушу зарыл. Жаңы саясий мамилелерди жана саясий маданиятты өнүктүрүш керек. Тарбиялоо жолу оор, анткени тарбиячылардын өздөрүнүн маданиятты жок. Алар үлгү боло албайт. Бирок биздин коомдо ушул критерийлерге жооп берген адамдар аз эмес. Аларга жол ачып бериш абзел. Шарт түзүп, жасалма тосколдуктарды түзбөш керек. Эң туура жана мыйзамдуу жол бул шайлоо. Ошол эле учурда акчасы жок адамдар тизмелерге илинбей калышы мүмкүн, демек шайлоо системаны оңдоо зарыл. Мен сунуштаган преференцилдык добуш берүүгө өтүү керек. Бул система жаңы лидерлерге жол ачат жана партиялык коррупциядан алыстатат.

Жогорку Кеңештин жаш депутаты Дастан Бекешев жаңы саясий элита акылдуу жана талантуу болуш керек экенин айтты

-Бизге жаны элита керек. Жаңы саясий элитаны биз тарбиялай албайбыз. Аларга саясатка келгенге шартары тузуш керек.